По Улица (1999), Музејот на современата уметност ја организира и втората изложба на фотографии на режисерот Милчо Манчевски, насловена како „Пет капки сон“, во која тој ги претставува сликите настанати во последните десетина години во вид на записи од мноштво различни секојдневни настани, улични сцени, филмски снимања, интимни белешки и се разбира од неговите постојани патувања, вклучувајќи ги и неколкуте посети на Индија, Азија и Африка..

Линеарната структура на Улица, во Пет капки сон Манчевски ја заменува со групирање на фотографиите во секвенци од пет фотографии, во кои се спојуваат потполно диспаратни простори, ситуации, времиња, ликови и карактери во еден зачудувачки и онирично сугестивен колаж од претстави, кои го предизвикуваат гледачот да учествува во откривањето на нивните неочекувани врски и значења, и во создавањето наши сопствени мали приказни.

Отварање на изложбата:

НУ Музеј на современата уметност, 16. јуни – 25. август 2010
Отворање на изложбата во среда, 16. јуни во 20,30ч.

Како што вели Манчевски:
“Во збирката композиции ПЕТ КАПКИ СОН ме интересираат две работи:
Експлозијата на визуелното во прозаичниот момент; и
Костецот и прегратката на наративното и формалното.
Фотографииве живеат само кога се заедно и кога формираат композиција. Kако ноти во песна. “

Милчо Манчевски (Скопје, 1959) е сценарист и режисер на филмовите Пред дождот (1994), Прашина (2001), Сенки (2007) и Мајки (2010) и на преку 50 кусометражни филмови, документарци, реклами, музички спотови и др. Манчевски е автор на книгата „Духот на мајка ми“ и на голем број куси раскази и есеи.
Учествува во уметничките перформанси на групата 1АМ и во неколку самостојни ликовни перформанси (1983, 1985 и 1986). Изложбата на фотографии Улица организирана во Музејот на современата уметност во Скопје во 1999 е поставена и во Стокхолм, Неапол, Стразбур, Санто Доминго и Солун.

За повеќе информации за творештвото на Милчо Манчевски, посетете ја: www.manchevski.com